Merenqa Ruleti

Ərzaqlar

• Otaq temperaturunda yumurta ağı – 180 q (təxminən 6 ədəd yumurta)
• Şəkər pudrası – 250 q
• Qarğıdalı nişastası – 25 q
• Limon suyu – 1 ç.q. (və ya 1 çimdik limon duzu)
• Duz - 1 çimdik
• Soyulmuş badam – 50 q
• Çiyələk – 100 q
• Qaragilə – 50 q

Krem üçün

• Soyuq halda 33% qaymaq – 90 q
• Labne və ya qaymaqlı pendir – 250 q
• Şəkər pudrası – 50 q

Hazırlanma qaydası

1. 1.Qab təmiz və quru olmalıdır. Yumurta ağını, duz və limon suyunu əlavə edib orta sürətdə mikserlə qarışdırın.
2. 2.Köpük halına gələndən sonra mikserin sürətini artırıb yavaş-yavaş şəkər pudrasını əlavə edin (təxmini 4 dəfəyə, hər 20 saniyədən bir).
3. 3.Şəkər tam əriyəndən və merenqa tam forma saxlayandan sonra qarğıdalı nişastası əlavə edib 20 saniyə qarışdırın.
4. 4.Soba nimçəsini tərsinə çevirib üzərinə silikonlaşdırılmış bişirmə kağızı sərin (mütləq silikonlaşdırılmış olmalıdır, əks halda merenqa yapışacaq). Üzərinə merenqanı yayıb badam səpələyin.
5. 5.Əvvəlcədən 150 dərəcəyə qızdırılmış sobada orta səviyyədə 30 dəqiqə bişirin. 15 dəqiqədən sonra hər ehtimala qarşı sobanı açıb yoxlayın ki, merenqanın üstü və dibi yanmasın.
6. 6.Merenqa bişəndən sonra üzərinə bişirmə kağızı və dəmir setka qoyub çevirin, ilk qoyduğunuz bişirmə kağızını ehtiyatla qoparın. Merenqanı tam soyumağa qoyun.
7. 7.Krem üçün ilk növbədə pendirlə şəkər pudrasını mikserlə qarışdırın. Sonra mütləq ən azı 33% yağlılığı olan soyuq qaymağı əlavə edib orta sürətdə krem halına gələnə kimi mikserlə qarışdırın.
8. 8.Kremi merenqaya yayıb üzərinə qaragilə əlavə edin və ehtiyatla rulet kimi bükün.
9. 9.Ruleti 2 saatlıq soyuducuya qoyun ki, krem stabilləşsin. Sonra üzərinə çiyələk əlavə edib servis edin.

Qeydlər

• Çalışın keyfiyyətli qaymaq alın ki, krem halına rahatlıqla gəlsin. Kremi çox qarışdırmayın, çünki əgər su verərsə, onu bərpa etmək mümkün olmayacaq.