Tavada Göyərtili Lavaş

Tələbələrin asanlıqla hazırlaya biləcəyi dadlı və doyumlu yemək. 3-4 nəfər üçün nəzərdə tutulub.

Ərzaqlar

• Sac lavaşı 10 ədəd
• Balaca sac lavaşı 10 ədəd
• Yumurta 4 ədəd
• Qarışıq göyərti 3-4 dəstə (dağ keşnişi, adi keşniş, yaşıl soğan, şüyüd)
• Kərə yağı 50 q (bitki yağı da olar)
• Kəsmik 100 q (9% yağlı olsa daha yaxşıdır)
• Şor 200 q
• Qara istiot
• Duz
• Süfrəyə vermək üçün: qatıq (zirinc, nar və ya sumaxla)

Hazırlanma qaydası

1. 1.Lavaşı və göyərtini doğrayıb dərin bir qaba tökün.
2. 2.Üzərinə çalınmış yumurta, duz, qara istiot, şor və kəsmik əlavə edib yaxşıca qarışdırın.
3. 3.Dibi yapışmayan tavaya yağ əlavə edib qızdırın.
4. 4.Alınan qarışığı tavaya töküb bərabər şəkildə yayın.
5. 5.Ən aşağı odda, tavanın qapağı bağlı şəkildə 10-12 dəqiqə bişirin.
6. 6.Alt hissəsi qızardıqdan sonra ehtiyatla çevirin və yenə qapağı bağlı şəkildə 10-12 dəqiqə bişirin. Nuş olsun!

Qeydlər

• Duzu ehtiyatla əlavə edin, çünki şor özlüyündə duzludur.
• Yeməyin dibinin yanmaması üçün od mütləq çox aşağı gücdə olmalıdır.
• Tavanın qapağını bağlamaq mütləqdir, əks halda yeməyin içi bişməyəcək.
• İstəyə görə sobada da bişirmək olar.